OppertshofenSeeOrtseingang ErlingshofenLuftbild OppertshofenLuftbild Donaumünster-ErlingshofenRathaus 2KindergartenRathaus FrontSonnenaufgang DonauLuftbild TapfheimBrachstadtLuftbild Brachstadt
Link verschicken   Druckansicht öffnen
 

Mundart in dr' Gmoid

07. 07. 2021

So, griaß Gott beinand,

 

dia Wuch gods oms essa ond drenga ond oms kocha ond ‘Kuche. Des gild fir alle, egal obs a gwambader Siach isch odr a klebbrigr Schbälder.

 

Heit ‘zdag gibd‘s ja alls megliche was ma zom drenga koffa ka was frier net geba hot. Bei os isch a bar mol em Johr dr „Oscho“ Ma komma. Der hod en seim Kombi alls denna kett was ma so zom kocha brauchd hod. Do hod ma abr ned bloß a Päckle Nudla kofft, do hod ma a ganza Schachdl  g’nomma, z‘ Maggi zom auffülla en Drei-Lidder- Flascha ond om widder aufs drenga zom komma, do hod ma an Sirup em Kanischder kofft, meischdens glei zwoi. Dean Sirup hod ma dann ens Leidungswasser nei, des hod vor allem a Farb geba, abr net viel G’schmack, weil ma hod ja schbara measa.

 

D‘ Männer hond am Obend om a Bier gschickd, des hod ma em Moßgruag en dr Wirtschaft g’hold. Des war fei gar net so oifach fr d‘ Kendr, wenns barafuaß ieber dia schdoinige Strossa, dia domols no net teert waran, des Bier hoim draga hond measa ohne zom vergezla. Meischdends honds o glei an groaßa Schluck drvo gnomma, nadierlich bloß wegam verschidda. Am Bronnadrog hod ma nochd dean Schluck widder aufg’fülld, damids dr Vader ned gmergd hod. Der hod dann högschdns gschompfa, was d’r Wirt heid widdr fr a wässrigs Bier beinand hod.

 

Zom Essa hods alls geba, was em Gärtle on auf‘m Feld g’wachsa isch, Gmias ond Kardoffl sowiaso. Odr ofd o a Mehlschbeis. A Fleisch hods ned Alldag geba, vielleicht am Samsde odr am Sonnde. Ond wenn ebbes iebr blieba isch vielleicht o no am Mede. Fr mi war emmr d‘ Soß z’wichdigschde, dia hod ma rausdongt bis d‘ Muader gsagt hod „da Hafa lond dr mr aber“. Kardofflschnitz, Scheiderhaufa, Oirhabr, a saura Lebr ond Kuddlfleg, z’meischde kennd ma heid gar nemme. Fr’d Nochschbeis hod ma Weckgläser em Keller kett mit Weichsla, Äpfl, Bira ond Zwetschga. Fr bsondre Däg hot ma o an Hafa mit‘m Rumtopf agsetzt. Do hod ma dann am Sonnde a Drepfle iebr sein Kuacha odr z‘ Eis griagt.

 

Wer Äpfl kett hod, der hod an Moschd a’gsetzd. Abr des isch manchmol schbrichwördle noch henda losganga, wenn ma‘n ned verdraga hod.

 

Em Wendr isch gschlachdad woara. Dr Metzgr isch in aller Herrgods Fria komma ond bis zur Brodzeid hods scha an Kesselschbeg geba. Do hod ma nebabei Schwarda gschnieda ond des was dr Metzger ned braucha hod kenna, isch alls en da Bressack ond end Bluadwurschd neigschnieda woara. Kendr hond‘s Bluad riera measa damids ned gschdoggt isch. Ond wenn dann dia Wurschd agrierd war, hod mas brobiera derfa. De Meischde hods grausd, mir abr ned.

 

Ond am Schluss hods a Kesselsupp geba, dia ma auf dr Nochbrschaft verdraga hod. Ganz friar hod ma o em Herr Pfarrer ond em Schuallehr a G’schlachdads brochd. Wenn dann d‘ Muader auf dia Däg drauf Flädla bacha hod, meischdens an ganza Schdoaß, ieber dean ma gar net nom gugga hod kenna ond dia friesch gschnieda en d‘ Kesselsupp neikomma sen, nochd war des dr greaschde Feschddag.

 

So glei isch Middag, heid gibd’s Kardofflschnitz drom muass e iatzt o aufheara.

 

An guada...

 

Dr‘ Burgamoischdr

 

Kontakt

Gemeinde Tapfheim

Ulmer Str. 66
86660 Tapfheim

 

Tel.: 0 90 70 / 96 66 - 0

Fax: 0 90 70 / 96 66 - 80

 

Veranstaltungen

Nächste Veranstaltungen:

28. 09. 2021 - 19:00 Uhr

 

04. 10. 2021 - 19:30 Uhr

 
Öffnungszeiten des Rathauses:
  • Montag 8 bis 12 Uhr
  • Dienstag 8 bis 12 Uhr
  • Mittwoch 8 bis 12 Uhr
  • Donnerstag 16 bis 18 Uhr
  • Freitag 8 bis 12 Uhr