Mundart in dr' Gmoid

Griaß Gott beinand,

wenn ma nix mea z’reda hod, dann kommd hald z’ Wedr dra. Des was mer d‘ Schtix Renade g‘schiggt hod, gild abr ned fr dia Wuch, des gild fr da letschda Monat. D‘ Renade hod mr allebod ebbes hergeba fr mei Sammlung ond drom kennandr dia Wuch amol was von ihra lesa, i denk des basst ganz guad:

Abr:

Ibral dees gleiche Gejomr:

Dees isch doch koi Weadr,

Dees isch doch koi Somr!

Freile, vor a bar Wucha,

do warn a bar hoiße Däg.

Viel z hoiß!

Dees war o koi Fred.

Abr iatzt!

Bloß Rega ond kald,

miascht eihoiza bald,

willsch net naus aus‘m Haus

ond häsch doch gnua zom doa em Garda daus.

Ma miaßt Pfingstroasa schneida,

Clematis naufbenda.

Ond erscht em  Gmiasbeddle henda!

Dees isch a Graus.

Do siegts echt grawulisch aus:

Dr Salat isch von de Schnecka gfressa

ond d Radiesla kasch o vrgessa,

d Roade Ranne wagsn en Boda nei,

dr Petersil miaßt eigentle o wo sei.

Fr d Erdbeer war dees huir ganz ond gar schlecht.

D Gurka wachsn o net recht.

Ond erscht dia Tomata ond Paprika!

Deane got d Sonna ganz arg a.

Abr:

Ds Giaßa kasch dr vrschpara.

Duat deim ganza Gschtell guat,

bsondrs de Fiaß ond deine Ara.

Ds Okraut gfreit se.

Dees schiaßt en d Heah, setzt scho Bliada a.

Dr Vortl isch,

dass mas beim Rausziaga guat alanga ka.

D Roasa sen vrwäscha,

d Bleamla hängan d Köpfla na, sen nemme schea.

Abr:

Dr Rasa hot huir gnua Wasser. Der isch schea grea.

Wagst wia wild. Schempf net, halt dei Gosch!

Frei de dra, dass beim Mäha gmua Bewegung hosch!

S isch wias isch. Denk positiv!:

Bei all deam Rega isch s doch guad,

dass r deiner Gsondheit o Ebbes Guats no duad.