Mundart in dr‘ Gmoid

So Leid‘, bak mers widder. I hoff, es wird net z‘lang wenn mer jeda Wuch ebes schreib‘n.

Letscht Wuch waran dia Kendr no gloi, dia Wuch schick mers end Schual. Also wenn dia so de erschde Däg en dr Schual send, ka‘s scha sei, dass des drhoim a mords Omuas isch, bis dia emmer aus dr Hausdir dausd send. Sia sollan ja gscheid agschläft sei, da Kiddl net hendrschgefier ahaba, alls drbei haba ond bloß nix vergessa. Dia Kendr hond an Ranza auf‘m Buggl wos ihra Zuig denna hond. Abrobo Ranza:  dr‘ Schialer hot sei Däsch ondram Ara ond an Ranza hot er o, abr net auf‘m Buggl! En dr‘ Schul hockt ma se dann en sei Bag nei ond basst auf, was dr‘ Schulleahr alls woiß. Des Schlemme isch drbei, des muass ma se o no alls merga was der verzählt. En osra Glass hots fierwiztige geba, a baar bsonders helle ond a baar Liachdla warand o drbei. Wenn oiner gar nix gwisst hot, dann wars a damischr Hond odr a Seggl. Bei de Mädla hots o a baar Drudschla geba, des warand dia, dia wo net so schnell gwesa send. Em Wendr hot ma a Daschaduach braucht, dass ma hot schneiza kenna. Do hots scha ab ond zua mol g’hoißa „buzzder fei dei Rotzglock“!

Oin hommer mol g’hett, der hot sei Rotzglock bis an da Kearza nalossa kenna ond hots dann widder nauf zoga, mei lieaber do hots os ebbl gscheid graust. Des war a richdiger Saubär. En dr nuia Schul hot ma dann o Hausschua odr Bodscha aziga measa, damit mr net da ganza Dreck von daust mit nei g’schleufd hond. En dr‘ dridda Glass isch ma nochd zom weißa Sonde komma. Des war friar a richdig groaß Feschd wo dia ganz Verwandtschaft komma isch. I hab mr‘ domols a Fahrrad koffa derfa. Des hot grad acht Däg ghalta, dann habes gliefert kett. Beim Sattler Vere danna habes mit‘m Haggaberg seim Goggo aufgnomma ond hab brobiert wer schneller über d‘ Kreizung kommt. Om an Muggaseggl hädes fascht packt. Bua do hots domols da Haggaberg en seim Goggo omanander gschiddlt. Ond dia Schempf wo der von seira Frau griagt hot, weil‘rs net dr’bremst hot! Do hot‘r mr faschd a weng loid dua, weil schuld war ja eigendlich i. Abr i ben o net viel besser wegkomma, weil i hab bei deara Sach mein guada Kommeoazug a‘ghett ond hab mer an mords Driangl neigrissa. Z‘ Fahrrad ond z‘ Goggo warand hee, abr soschd isch nix bassiert.

I denk von dr Schualzeit ka so Mancher ebbes verzähla. Wenn ‘dr mr a baar so Gschichtla zamma schreiba dädnt, dann däde dia o mit en osra Sammlung mit aufnemma. Schea langsam kommt scha was zam.

Dr‘ Burgamoischdr