Mundart in dr' Gmoid

11. 05. 2021

So, griaß Gott mitanandr, wia letscht Wuch gschrieba, gugg mer heit, was mr ieber Kendr so als griagt hond.


Also, wenn dia Gloine auf d‘ Weld kommand, dann senns erschd amol Buzala. In dera Zeit, ka dr Vadr mit‘n no net bsonders viel afanga, weil‘r mit seine groaße Bratza gar net woiß, wo‘r nalanga soll odr derf. Ond dann suifrand dia Gloine hald o arg omanand ond des mag´r scha ieberhaubt net auf seim Sondehemmad.


Meischdns macht Muadr an Omuas und no mehr d‘ Groaßmuadr. Aber so mit am Johr, wenns nochd amol z‘ graddla afangand, dann weards indressand. Do muass ma fei bsonders aufbassa, weil nix mea sicher isch. Do sei‘s scho vorkomma, dass des Gloine dr Katz beim Saufa an dr Milleschüssl zuaguggt hot und dasses selber o aus deara Katzaschüssl gsuffa hot.


Des isch o dia Zeit, wo ma jeden Dag a baar frische Drialerla braucht, weils ja beim Essa mit Händ ond Fiaß mittschaffand ond drbei dia halba Kuche verloasand. Nochm Essa miasand dia Kendr an Kobber macha, damit des was neikomma isch o denna bleibt. Wenns beim Essa bressierd ond alls schnell nei g’schoba weard, kas sei, dass dia an Hägger griagen ond z’meischde widder raus schbeiand. Wenn des dr‘ Vadr emmer siggd, würgt‘zn ellaweil, dass´r nix mea brauchd. Do schmegd‘m nemme amol sei Bier ond des hoist fei ebbes.
Wenn ma amol naa floga isch, hot ma blärrt ond greinad. Heit derfand dia Kendr des ja nemme, weils ohygienisch isch. Abr friar hond se ‘d Kendr scho sellesmol o im Dreeg gwälzt. So mit zwoi, drei Johr, wearns dann zom Schmalgerle ond babblan d´ ganza Dag vor se na. Zom schbiela beim Neiber hots a Heisel-Eck geba, des war oba droba onderm Daach, wo de Groaße gar net nei komma send. Do hab i mit‘m Neiber Michl, des war mei Freind, emmer g’heiselt.


Es hot nadierle friar koi „Krippe“ fir‘d Kendr geba. Tande Dora hot dia em Kendrgarda erscht gnomma wenns sauber warand ond nemme in‘d Hos gschissa hond. Wenn des em Kendrgarda aber trotzdeam amol vorkomma isch, hod ma‘s oifach auszoga ond mit’m Schlauch odr am Kibl Wasser agwescha ond guad isch gwest. Do hot ma net allwei glei a Gschieß gmacht.


So iatzt hommer vor lauder gloine Kendr gar nix zu de Groaße g’schrieba. I denk des mach mer negscht Wuch ond I wesch eich an scheana Feierde.


Dr‘ Burgamoischdr