Mundart in dr' Gmoid

So, griaß Gott mitanander,

letschd Wuch bene net drzua komma, weil me am Afdermede z‘ Empfa recht beidld hod.

Dass ui aber was aganga isch, habe scha heara measa:

„Hallo Burgamoischdr,

em letschda Amtsblatt hot was gfehlt. Zerscht hae denkt, du woisch koine Wördr mea ond hab ganz schnell guggt, dass i mei Lischte ferte breng.

Aber do kommt halt all Däg no Ebbes drzua. Sia isch no net ferte, doch jetzt schickes ganz oifach. Viele Wörtr senn drbei dia Du scho kennsch, viele abr o beschtimmt no net. I hätts scho no alle ibrsetza wölla, Zeit ischs zweng.“

Des hod d‘ Stix Renade g’schrieba, weil dia arbad mit Händ ond Fiaß ond mit ganz viel Hira, dass mr a Biachle zambrengand, damit de Jonge schbäder o no was von osram Dialegt wissnd.

Des mit deam ibersetza isch gar net so eufach. I schreib ui iatzt emmer a baar Sacha auf wo‘r iberlega kennand was des isch odr wia ma des eideitscha keand.

Hosaloddle

Dachhaas

Kaamer

Ziach ond z‘ Kopfaziachle

Millenudla

Razza

kääb do

guisga

Muggaseggl

Ranzapfeifa

Millekanna

geezla

koppernegisch

Deand na vielleicht d‘ Nochbrschaft o a weng froga, dass a wenig naus kommand bei deam schena Wedr. Wenn euner a scheans Schnaderhipfle woiß, derf er mer des geara brenga.

Zom Schluss:

Sagd dr‘ Sell zom Dogdr: Du Dogdr iatzt benne 78. Kaasch du mir saga, wia i 100 weara ka? Do sagd dr Dogdr glad: Rochsch du? Noi. Saufsch du? Noi. Warum willsch du Rendvieh dann 100 weara?

So isch’s hald, wia ‘sesch machsch isch‘s verkehrt.

An Gruaß, dr‘ Burgamoischdr